شخصية الوكيل
اسم الوكيل، أسلوب كلامه، لهجته، ورسالة الترحيب اللي بيبدأ بيها.
الشخصية هي أول حاجة العميل بيحس بيها: الوكيل بيقدّم نفسه بإيه، وبيتكلم إزاي. تتظبط من الوكيل الذكي ← شخصية الوكيل، وبعد أي تعديل اضغط حفظ الإعدادات.
افتح الوكيل الذكياسم الوكيل
الاسم اللي بيعرّف بيه نفسه للعميل وبيظهر في الشات. اختار اسم بسيط يناسب شركتك:
- «نور من الأفق للسياحة»
- «سارة»
- «مساعد النيل»
نصيحة
اسم بشري زي «نور» أو «سارة» بيدّي إحساس أقرب، وإضافة اسم الشركة («نور من الأفق») بتطمّن العميل إنه بيكلم الشركة الصح.
أسلوب الكلام
| الأسلوب | مناسب لـ | مثال |
|---|---|---|
| ودود | أغلب الشركات، الرحلات الداخلية والعائلات | «تمام جدًا! عندنا عرض حلو لشرم الشيخ الشهر ده، أبعتلك التفاصيل؟» |
| رسمي | العمرة والحج، الشركات والسفر الرسمي | «متاح لدينا برنامج شرم الشيخ 5 ليالي شامل الإفطار. تحب أبعت لحضرتك التفاصيل؟» |
| فاخر | شهر العسل، الفنادق الفخمة، البرامج المميزة | «يسعدنا نرتب لحضرتك إقامة مميزة في جناح مطل على البحر مع استقبال خاص من المطار.» |
في الأسلوب الودود الوكيل ممكن يستخدم إيموجي واحد بالكتير في الرسالة (✈️ 🕋 🌴). في الرسمي والفاخر مفيش إيموجي خالص.
اللهجة
| اللهجة | مثال |
|---|---|
| مصري | «أهلًا بحضرتك! تحب تسافر إمتى، وهتكونوا كام فرد؟» |
| خليجي | «هلا والله! متى ودك تسافر، وكم شخص معك؟» |
| شامي | «أهلين! إيمتى حابب تسافر، وقديش عددكم؟» |
| فصحى | «مرحبًا بك! متى تودّ السفر، وكم عدد المسافرين؟» |
| حسب العميل | بيرد بنفس لهجة العميل: مصري للمصري، خليجي للخليجي، وإنجليزي لو كتب إنجليزي. |
أي لهجة أختار؟
لو أغلب عملاءك من بلد واحد، اختار لهجتهم. لو عندك عملاء مصريين وخليجيين، أو عملاء بيكتبوا إنجليزي، اختار حسب العميل. في كل الحالات الوكيل بيفهم الفرانكو وبيرد بالحروف العربي.
رسالة الترحيب
أول جملة بيبدأ بيها أي محادثة جديدة. في لينك الشات العام بتظهر للعميل أول ما يفتح الشات. لو سبتها فاضية، بتظهر رسالة جاهزة فيها اسم الوكيل واسم شركتك.
أمثلة كويسة:
- «أهلًا بحضرتك في الأفق للسياحة! أنا نور، أقدر أساعدك تختار رحلتك الجاية. بتفكر تسافر فين؟»
- «حياك الله في النخبة للسفر! تبي عمرة، ولا رحلة سياحية؟»
- «أهلًا بيك! عندنا برامج عمرة وتركيا وشرم الشهر ده. تحب أرشحلك إيه؟»
خلّيها قصيرة وفيها سؤال
رسالة ترحيب طويلة فيها كل عروضك بتضيّع العميل. جملتين بالكتير، وآخرها سؤال يخلّي العميل يرد.
من غير ما تكتب كل حاجة
الأسلوب واللهجة مش محتاجين تعليمات زيادة. الوكيل كمان بيكتب على طريقة واتساب: رسايل قصيرة (2–5 سطور)، سؤال أو اتنين بالكتير، والأسعار بالأرقام والعملة، زي «28,500 جنيه للفرد في الغرفة الثلاثية».