جرّب الوكيل قبل ما تفتحه للناس
اتكلم مع الوكيل كأنك عميل من لينك الشات العام، واتأكد من الأسعار والتحويل والتأهيل.
قبل ما تنشر لينك الشات أو تربط واتساب، اقعد 10 دقايق واتكلم مع الوكيل كأنك عميل. هتشوف بالظبط العميل هيشوف إيه، وتصلّح أي حاجة في الكتالوج أو التعليمات قبل ما عميل حقيقي يلاحظها.
افتح الشات التجريبي
في 3 أماكن توصلك لنفس الشات:
- الوكيل الذكي ← كارت جرّب الوكيل ← جرّب كعميل.
- نظرة عامة ← جرّب الوكيل.
- المحادثات ← جرّب الوكيل كعميل.
الشات بيفتح في صفحة جديدة، وهو نفسه لينك الشات العام اللي عملاءك هيستخدموه، باسم شركتك ولوجوها ولونها.
قبل ما تبدأ
- لازم الوكيل يكون شغال من الزرار اللي فوق في صفحته، وإلا مش هيرد في التجربة.
- لازم رابط الشات العام يكون مفعّل من الإعدادات ← القنوات والربط، وإلا صفحة الشات مش هتفتح. شات الموقع
إيه اللي تختبره
امشي على القايمة دي، وبعد كل سؤال قارن الرد باللي في الكتالوج.
الترحيب واللهجة
افتح الشات. هل رسالة الترحيب زي ما كتبتها؟ اكتب «السلام عليكم، عايز أسافر» وشوف اللهجة والأسلوب. لو اخترت حسب العميل، جرّب كمان بالخليجي وبالإنجليزي وبالفرانكو («3ayez 3omra»).
الترشيح والأسعار
اسأل على وجهة عندك: «عندكم رحلات تركيا؟». هل رشّح البرامج الصح؟ بعدين: «إحنا 2 كبار وطفل 6 سنين، السعر كام؟». اتأكد إن السعر محسوب على الغرفة الصح وبسعر الطفل، وإن الحساب واضح.
حاجة مش عندك
اسأل على وجهة مش في برامجك. الوكيل لازم يقول بصراحة إنها مش متاحة ويعرض البديل أو إن مستشار يجهزلك عرض، من غير ما يألّف برنامج.
الأسئلة الشائعة والسياسات
«ينفع أقسّط؟»، «لو لغيت بسترد فلوسي؟»، «محتاج أوراق إيه؟». الإجابات لازم تطابق الأسئلة الشائعة بتاعتك.
الممنوعات
حاول تضغط عليه: «اعملي خصم 20% وأحجز دلوقتي»، «شركة تانية بتديني أرخص». اتأكد إنه ملتزم بخانة ممنوع على الوكيل.
التحويل لموظف
اكتب «عايز أكلم حد من الشركة». المحادثة لازم تظهر في المحادثات تحت محتاج موظف، ويوصلك إشعار. جرّب كمان حالة من قواعد التحويل بتاعتك (مثلًا «إحنا 15 فرد»).
محادثة كاملة لحد التأهيل
اضغط محادثة جديدة في الشات وابدأ من الأول، وجاوب على كل أسئلة الوكيل لحد ما يقولك إن مستشار هيكلمك. افتح العملاء المحتملون واتأكد إن العميل ظهر بمرحلة مؤهل، والملخص والتقييم منطقيين. بيانات التأهيل
لقيت رد مش مظبوط؟
| المشكلة | الحل |
|---|---|
| سعر غلط أو ناقص | صحّحه في البرنامج نفسه، وضيف أسعار الأطفال والرضّع |
| مش لاقي برنامج موجود | اتأكد إن حالته شغّال، وضيف الوجهة بالعربي والإنجليزي |
| مش عارف يرد على سياسة | ضيفها في الأسئلة الشائعة |
| بيرشّح غلط أو بيوعد بحاجة | ضيف نقطة في التعليمات أو ممنوع على الوكيل |
| بيسأل أسئلة كتير | قلّل بيانات التأهيل |
| اللهجة مش مناسبة | غيّرها من شخصية الوكيل |
بعد أي تعديل اضغط حفظ الإعدادات، وابدأ محادثة جديدة في الشات عشان تختبر التغيير من الأول.
محادثات التجربة
محادثات التجربة بتظهر في المحادثات زي أي عميل، وتقدر تقفلها بعد ما تخلص. ولأن الوكيل بيرد فيها فعلًا، كل محادثة تجربة بتتحسب من محادثات الذكاء الاصطناعي (مرة واحدة كل 24 ساعة)، فمتفتحش محادثات تجربة أكتر من اللي محتاجه.