الكتالوج
البرامج والخدمات والأسئلة الشائعة هي كل اللي الوكيل الذكي يعرفه عن شركتك. اللي مش هنا، مش هيبيعه.
الوكيل الذكي مابيألّفش أسعار ولا مواعيد ولا فنادق ولا سياسات. كل معلومة بيقولها للعميل بيجيبها من الكتالوج بتاعك وقت المحادثة. عشان كده الكتالوج المظبوط هو أهم حاجة تعملها عشان الوكيل يبيع صح.
الكتالوج فيه إيه؟
البرامج السياحية
رحلاتك الجاهزة: عمرة، حج، سياحة خارجية وداخلية، شهر عسل... بأسعارها ومواعيدها وفنادقها.
الخدمات
الخدمات المنفصلة: تأشيرات، طيران، فنادق، تأمين، انتقالات... بأسعارها ومستنداتها.
الأسئلة الشائعة
إجاباتك الرسمية عن الدفع والإلغاء والمستندات وأي سؤال عام.
الوكيل بيستخدم الكتالوج إزاي؟
| العميل بيسأل عن | الوكيل بيدوّر في | وبيشوف إيه |
|---|---|---|
| رحلة أو وجهة («عندكم تركيا في أغسطس؟») | البرامج الشغالة | الاسم، الوجهات، الملخص، مدينة السفر، سعر «يبدأ من»، ومواعيد السفر الجاية المتاحة |
| تفاصيل برنامج معين | البرنامج نفسه | الأسعار حسب الغرفة والفئة، المواعيد والمقاعد، الفنادق، برنامج الرحلة، يشمل / لا يشمل، الشروط، وتعليماتك ليه |
| تأشيرة أو تذكرة أو فندق لوحده | الخدمات الشغالة | السعر وطريقة التسعير، مدة التنفيذ، المستندات المطلوبة، وتعليماتك ليه |
| الدفع، الإلغاء، المستندات، أي حاجة عامة | الأسئلة الشائعة المفعّلة وبيانات الوكالة | الإجابة اللي كتبتها، وبيصيغها بلهجة العميل |
لو الإجابة مش موجودة، الوكيل بيقول للعميل إن مستشار هيأكد له، أو بيحوّل المحادثة لفريقك.
المسودة والمتوقف مش بيتعرضوا
الوكيل بيشوف بس البرامج والخدمات اللي حالتها شغّال، والأسئلة المفعّلة. المسودات والمتوقف والمؤرشف كأنهم مش موجودين بالنسبة له.
إيه اللي العميل عمره ما هيشوفه؟
- التكلفة والربح في البرامج والخدمات: للاستخدام الداخلي بس، لا العميل يشوفهم ولا الوكيل الذكي.
- تعليمات الوكيل الذكي في كل برنامج وخدمة: الوكيل بيقراها عشان يعرف يبيع إزاي، بس مابيقولهاش للعميل.
قائمة قبل ما تشغّل الوكيل
- كل البرامج اللي بتبيعها دلوقتي متضافة وشغّالة، وفيها سعر بالغ واحد على الأقل.
- مواعيد السفر الجاية متضافة، وعدد المتاح مظبوط.
- الخدمات اللي بتعملها لوحدها (تأشيرات، طيران...) متضافة بأسعارها ومستنداتها.
- أسئلة الدفع والإلغاء والمستندات متجاوب عليها في الأسئلة الشائعة.
- جرّبت الوكيل بنفسك وسألته أسئلة عملائك الحقيقية من جرّب الوكيل.
خلي الكتالوج دايمًا محدّث
لما برنامج يكمل عدده أو يتلغي، وقّفه أو غيّر حالة الميعاد على طول. الوكيل بيقرا الكتالوج في كل رسالة، فأي تعديل بيوصل له فورًا.
مين يقدر يعدّل الكتالوج؟
المالك والمدير. مشرف العملاء مابيشوفش صفحات الكتالوج.
الكتالوج والصفحة العامة
البرامج الشغالة تقدر تظهر كمان في صفحتك العامة من سويتش في الصفحة العامة جوه كل برنامج. الباقة Starter بتعرض لحد 10 برامج في الصفحة.